Кыргыз Республикасынын Өкмөтүнүн токтому

Бишкек шаары, 2015-жылдын 17-ноябры № 774

Акциялардын мамлекеттик пакеттерин баалуу кагаздардын рыногунда сооданы уюштуруу аркылуу сатуу жөнүндө жобону бекитүү тууралуу

"Кыргыз Республикасында мамлекеттик менчикти менчиктештирүү жөнүндө" Кыргыз Республикасынын Мыйзамынын 14-беренесине ылайык Кыргыз Республикасынын Өкмөтү токтом кылат:

1. Тиркелген: Акциялардын мамлекеттик пакеттерин баалуу кагаздардын рыногунда сооданы уюштуруу аркылуу сатуу жөнүндө жобо бекитилсин.

2. Ушул токтом расмий жарыяланган күндөн он беш күн өткөндөн кийин күчүнө кирет.

"Эркин Тоо" газетасынын 2015-жылдын 24-ноябрында N 114 жарыяланды

Тиркеме

Акциялардын мамлекеттик пакеттерин баалуу кагаздардын рыногунда сооданы уюштуруу аркылуу сатуу жөнүндө

ЖОБО

(КР Министрлер Кабинетинин 2023-жылдын 18-сентябрындагы N 483 токтомунун редакциясына ылайык)

1. Жалпы жоболор

1. Ушул Жобо баалуу кагаздардын рыногунда сооданы уюштуруу аркылуу акцияларды жайгаштыруу жана сатуу методу менен акциялардын мамлекеттик пакеттерин сатуунун шарттарын жана тартибин жөнгө салат.

2. Ушул Жободо төмөнкүдөй негизги терминдер, түшүнүктөр пайдаланылат:

депозитарий - баалуу кагаздарды сактоо, баалуу кагаздарга карата менчик укугун жана укуктарды өткөрүп берүүнү эсепке алуу боюнча депозитардык ишти жүзөгө ашырган, баалуу кагаздар рыногунун кесипкөй катышуучусу;

клиринг - баалуу кагаздар менен бүтүмдөрдү түзүүнүн натыйжасында ишке ашырылуучу эсептөөлөргө катышуучу тараптардын өз ара талаптарын жана милдеттенмелерин чегерүү;

депо эсеби - депоненттин реквизиттерин каттоону, анын баалуу кагаздарынын эсебин алууну жана ошол баалуу кагаздар менен бекемделген укуктарын аныктоону камсыз кылган депозитарийдин эсептик системасындагы жазуулардын жыйындысы;

ыйгарым укуктуу орган - мамлекеттик мүлктү башкаруу тармагындагы ыйгарым укуктуу мамлекеттик орган;

сатыктын катышуучулары - сатыктын катышуучусу катары каттоо жол-жобосунан өткөн жана тийиштүү келишимди түзгөн, Кыргыз Республикасынын баалуу кагаздар рыногунда брокердик жана/же дилердик иштерди жүзөгө ашырууга лицензиясы бар, баалуу кагаздар рыногунун кесипкөй катышуучулары.

3. Ыйгарым укуктуу орган менчиктештирүүнүн тандалып алынган методу боюнча Кыргыз Республикасында мамлекеттик менчикти менчиктештирүү программасына ылайык фонддук биржада акционердик коомдордун акцияларынын мамлекеттик пакетин сатууга коёт.

4. Ыйгарым укуктуу орган брокердик ишти жүзөгө ашырган, баалуу кагаздар рыногунун кесипкөй катышуучусу - өзүнүн өкүлү аркылуу фонддук биржанын соода аянтында акциялардын мамлекеттик пакетин сатууну ишке ашырат. Брокер менен келишим түзүлөт, анда тараптардын өз ара милдеттери, анын ичинде мамлекетке тийиштүү болгон акцияларды ыйгарым укуктуу орган тарабынан белгиленген баадан кем эмес сатуу боюнча милдеттери аныкталат. Зарылдыгына жараша келишимде башка да шарттар каралышы мүмкүн.

5. Ыйларым укуктуу орган өкүлдү тендердик негизде аныктайт. Ыйгарым укуктуу органдын өкүлүнүн функциясына сатыкка коюлган акцияларды сатууга коюу жана биржалык сооданын катышуучулары менен контракттарды түзүү кирет.

6. Биржалык фонд аркылуу акциялардын мамлекеттик пакеттерин сатып алуу-сатуу бүтүмдөрү боюнча эсептөөлөр жана клиринг жалпы эрежелерге жана фонддук биржанын, депозитарийдин жоболоруна ылайык ишке ашырылат.

7. Акциялардын мамлекеттик пакеттерин сатууда баалуу кагаздар менен бүтүмдөргө карата колдонуудагы мыйзамда көрсөтүлгөн бардык шарттар сакталууга тийиш.

2. Сатуу алдындагы жол-жоболор

8. Фонддук биржа аркылуу акциялардын мамлекеттик пакеттерин сатууга ыйгарым укуктуу органдын катышуусунун милдеттүү шарты - ыйгарым укуктуу органдын өкүлүнүн депо эсебиндеги акцияларды депозитарийдин ички шартnарына ылайык ачылуучу депозитарийге депонирлөө болуп саналат.

9. Акциялардын мамлекеттик пакетинин биринчи сатыгы аларды сатуу жөнүндө кулактандыруу жарыялангандан кийин, 30 (отуз) иш күндөн эрте башталбайт.

10. Фонддук биржада соодалашуу сессиясы башталаар алдында тоорук үчүн бардык жеткиликтүү ыйгарым укуктуу органдын өкүлүнүн депо эсебиндеги баалуу кагаздар боюнча позициялар депозитарий аркылуу фонддук биржанын соода системасына өткөрүлүп берилет. Ошону менен, ыйгарым укуктуу органдын депо эсебиндеги баалуу кагаздар соода сессиясы аяктаганга чейин тосмолонот.

11. Сатыкка коюлган акцияларды сатып алууну каалаган сатыктын катышуучусу тоорук өткөрүү күнүнөн мурдагы эки жумушчу күндөн кечиктирбей, баштапкы баа боюнча акциялардын наркынын 10 пайыз суммасында кепилдик төгүмдөрүн төлөөгө тийиш. Кепилдик төгүм көрсөтүлгөн тооруктун катышуучусу үчүн эсептешүү банкында ачылган депозитарийдин клирингдик субэсебине төгүлөт.

3. Фонддук биржанын соода аянтында акциянын мамлекеттик пакеттерин сатуу жол-жоболору

12. Ыйгарым укуктуу органдын өкүлү акционердик коомдордун сатууга коюлган акцияларды сатып алууга табыштаманы соода системасына киргизет. Акциялардын ар бир пакетине табыштама баалуу кагаздын символун, акциялардын санын жана акция үчүн суралган бааны камтууга тийиш.

13. Коюлган акциялардын пакетин сатып алууну каалаган брокердик кеңселер соода системасына акцияларды сатып алуу табыштамасын киргизет. Акцияларды сатып алууга табыштама баалуу кагаздын символун, акциялардын санын жана акция үчүн суралган бааны камтууга тийиш.

14. Табыштаманы коюуну соодалашуу сессиясынын учурунда сатыктын катышуучулары жүргүзөт.

4. Соодадан кийинки жол-жоболор

15. Сооданын жыйынтыгы боюнча ар бир жарактуу бүтүмгө контракт таризделет, ага фонддук биржанын соода аянтында ыйгарым укуктуу органдын өкүлү катары сатуучу, биржалык сатыктын катышуучусунун трейдери катары сатып алуучу жана фонддук биржа тарабынан фонддук биржанын администратору кол коёт. Контракт фонддук биржанын соода аянтында бүтүм түзүлгөнүн ырастоочу расмий документ катары кызмат кылат.

16. Акча каражаттары боюнча милдеттенмелердин клирингинин жыйынтыгы боюнча депозитарий тийиштүү акча каражаттарын сатып алуучулардын банктык эсептеринен ыйгарым укуктуу органдын банктык эсебине которуу жөнүндө эсептешүү банкына буйрук берет.

17. Акциялардын мамлекеттик пакеттерин сатып алуучулардын акча каражаттарын ыйгарым укуктуу органдын эсебине которуу жөнүндө буйрукту аткаруу тууралуу ырастоону алгандан кийин, депозитарий эсептик банктын ыйгарым укуктуу органынын өкүлүнүн депо эсебинде тосмолонгон баалуу кагаздарды сатып алуучулук депо эсебине которууну ишке ашырат.

18. (КР Министрлер Кабинетинин 2023-жылдын 18-сентябрындагы N 483 токтомуна ылайык күчүн жоготту)

19. Ыйгарым укуктуу органдын фонддук биржа жана депозитарий менен өз ара эсептешүүлөрү фонддук биржанын жана депозитарийдин колдонуудагы тарифтерине ылайык жөнгө салынат. Фонддук биржанын жана депозитарийдин кызматтары үчүн төлөмдүн суммасы сатып алуучу тарабынан төлөнөт.

20. Ыйгарым укуктуу орган менен сатып алуучунун ортосундагы өз ара эсептешүү жол-жоболору аяктагандан кийин акцияны сатуу-сатып алуу келишими түзүлөт.