Чоңдуктар бирдиктеринин улуттук эталондорун бекитүү, Кыргыз Республикасынын Улуттук эталондордун мамлекеттик реестрин жүргүзүү ТАРТИБИ

Кыргыз Республикасынын Өкмөтүнүн токтому

Бишкек шаары, 2020-жылдын 24-августу № 441

Чоңдуктар бирдиктеринин улуттук эталондорун бекитүү, Кыргыз Республикасынын улуттук эталондорунун мамлекеттик реестрин жүргүзүү тартибин бекитүү жөнүндө

"Өлчөө бирдиктүүлүгүн камсыз кылуу жөнүндө" Кыргыз Республикасынын Мыйзамынын 6-беренесин ишке ашыруу максатында, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү токтом кылат:

1. Чоңдуктар бирдиктеринин улуттук эталондорун бекитүү, Кыргыз Республикасынын улуттук эталондорунун мамлекеттик реестрин жүргүзүү тартиби тиркемеге ылайык бекитилсин.

2. Төмөнкүлөр күчүн жоготту деп таанылсын:

- Кыргыз Республикасынын Өкмөтүнүн 2013-жылдын 2-апрелиндеги № 164 "Чоңдуктар бирдиктеринин улуттук жана баштапкы эталондорун бекитүү, Кыргыз Республикасынын Улуттук эталондордун мамлекеттик реестрин жүргүзүү тартибин бекитүү тууралуу" токтому;

- Кыргыз Республикасынын Өкмөтүнүн 2015-жылдын 16-мартындагы № 125 "Кыргыз Республикасынын Өкмөтүнүн 2013-жылдын 2-апрелиндеги № 164 "Чоңдуктар бирдиктеринин улуттук жана баштапкы эталондорун бекитүү, Кыргыз Республикасынын улуттук эталондорунун мамлекеттик реестрин жүргүзүү тартибин бекитүү тууралуу" токтомуна өзгөртүүлөрдү жана толуктоолорду киргизүү жөнүндө" токтому.

3. Ушул токтом расмий жарыяланган күндөн тартып он беш күн өткөндөн кийин күчүнө кирет. 


Кыргыз Республикасынын Премьер-министри


К.Боронов
























Тиркеме




Чоңдуктар бирдиктеринин улуттук эталондорун бекитүү, Кыргыз Республикасынын улуттук эталондорунун мамлекеттик реестрин жүргүзүү
 ТАРТИБИ 

1-глава. Жалпы жоболор

1. Ушул Тартип метрология боюнча улуттук органга жана Кыргыз Республикасынын улуттук жана баштапкы эталондорун сактоочулар болуп саналган юридикалык жактардын метрологиялык кызматтарына жайылтылат.

2. Эталон - чоңдуктун бирдигин же өлчөө шкаласын кайра жаратуу же алуу, сактоо жана берүү үчүн арналган өлчөө каражаты;

баштапкы эталон - жогорку метрологиялык касиеттерге ээ болгон (өлкөдө, региондо, уюмда, лабораторияда) жана ага баш ийген эталондорго жана өлчөө каражаттарына чоңдуктун бирдигин же өлчөө шкаласын берүүчү эталон;

улуттук эталон - мамлекетте же экономикада өлкө үчүн баштапкы катары пайдалануу үчүн өлчөө бирдиктүүлүгүн камсыз кылуу боюнча мамлекеттик орган тарабынан таанылган эталон;

эталонду түзүү - эталонду комплекттөө үчүн тактыктын зарыл болгон деңгээлине ылайык келген өлчөө каражаттарын иштеп чыгуу жана даярдоо же болбосо сатып алуу;

эталондорду сактоо - эталондорго карата милдеттүү метрологиялык жана техникалык талаптарды, ошондой эле аларды күтүүгө жана колдонууга карата талаптарды аткарууну камсыз кылуу үчүн зарыл болгон операциялардын жыйындысы.

3. Өлчөөлөрдүн бул түрүндө жогорку метрологиялык жана техникалык мүнөздөмөлөргө ээ болгон юридикалык жактардын метрологиялык кызматтарынын эталондору Кыргыз Республикасынын баштапкы эталондору катары таанылышы мүмкүн.

4. Башка уюмдарда сакталган Кыргыз Республикасынын физикалык чоңдуктарынын айрым бирдиктеринин баштапкы эталондоруна ушул Тартипке ылайык улуттук эталондордун статусу берилет.

5. Улуттук жана баштапкы эталондор сактоо жана колдонуу процессинде өз статусун жана метрологиялык мүнөздөмөлөрүн ырастоо үчүн тиешелүү эл аралык (мамлекеттер аралык) эталондор менен салыштырылууга, калибрленүүгө же текшерилүүгө тийиш. Ар бир эталон үчүн өлчөө бирдиктүүлүгүн камсыз кылуу боюнча мамлекеттик орган тарабынан бекитилүүчү байкоо жүргүзүү схемасы иштелип чыгат.

6. Баштапкы эталон сактоочу уюмдун жетекчиси тарабынан бекитилет.

7. Республиканын ичинде байкоо жүргүзүү камсыздалбаган же физикалык чоңдуктун бирдигин түздөн-түз жүзөгө ашырган эталондор гана улуттук эталондор катары бекитилиши мүмкүн.

8. Улуттук эталондор Кыргыз Республикасынын улуттук эталондорунун мамлекеттик реестрине киргизилет.

2-глава. Улуттук эталондору түзүү жана бекитүү тартиби

9. Улуттук эталондор улуттук эталонду түзүү боюнча техникалык тапшырманын негизинде иштелип чыгат.

10. Кыргыз Республикасында улуттук эталондорду түзүү боюнча техникалык тапшырма метрология боюнча улуттук орган же юридикалык жактардын метрологиялык кызматтары тарабынан иштелип чыгат, алар Кыргыз Республикасынын улуттук жана баштапкы эталондорун сактоочулар (мындан ары - эталондорду сактоочулар) болуп эсептелет.

11. Республиканын жаңыдан түзүлгөн же колдонуудагы эталондору улуттук эталон катары бекитилүүгө тийиш.

12. Эталондорду даярдоону жана улуттук катары бекитүүгө берүүнү уюмдар - эталондорду сактоочулар жүргүзөт.

13. Эталонду улуттук катары бекитүүгө берүү үчүн эталондорду сактоочулар өлчөө бирдиктүүлүгүн камсыз кылуу боюнча мамлекеттик органга өтүнмө даярдайт. Өтүнмө төмөнкүдөй документтердин топтомун камтыйт:

1) эталонду түзүү боюнча техникалык тапшырманы;

2) биринчи иштелип чыккан же өркүндөтүлгөн эталондор үчүн, ошондой эле эталон негизги жана көмөкчү техникалык каражаттардын комплексин билдирген учурларда иштелип чыгуучу эксплуатациялык документ түрүндөгү эталондун паспортун. Эгерде, эталон катары эталонду же бекитилген типтеги өлчөө каражатын колдонсо, ошол эталондун же өлчөө каражатынын паспортун колдонушат;

3) уюмдун мөөрү менен же болбосо нотариалдык жактан күбөлөндүрүлгөн баштапкы эталон катары бекитүү тууралуу буйруктун көчүрмөсүн;

4) эталонду күтүү жана колдонуу эрежелерин.

14. Эталон түзүүгө техникалык тапшырма эталондун абалын жана аны сактоо шарттарын талдоонун негизинде түзүлөт жана төмөнкүдөй документтердин тизмесин камтыйт:

- эталондун абалын талдоону, изилдөөнүн, калибрлөөнүн жана/же текшерүүлөрдүн жыйынтыктарын;

- лабораториялык жайлардын абалын талдоону, сактоо жана колдонуу шарттарына карата талаптарды; 

- жабдууга, желдетүү системасына техникалык спецификацияларды.

"Эталондун абалын талдоо, изилдөөнүн, калибрлөөнүн жана/же текшерүүнүн жыйынтыктары" бөлүгүндө төмөнкүлөр көрсөтүлөт:

- эталондун аталышы;

- эталонду эксплуатациялоого киргизүү датасы;

- эталондун курамы;

- уюмдун-эталонду сактоочунун жайгашкан жери жана аталышы;

- эталондун сыпаттамасы жана иштөө принциби;

- эталондун метрологиялык мүнөздөмөлөрү (чоңдуктун диапазону же номиналдык мааниси, өлчөөлөрдүн аныксыздыгы, метрологиялык мүнөздөмөлөрүн изилдөө ыкмалары);

- бул эталонду башка өлкөлөрдүн эталондору менен салыштыруунун жыйынтыктары.

15. Эталондун паспортунун формасы өлчөө бирдиктүүлүгүн камсыз кылуу боюнча мамлекеттик орган тарабынан бекитилет.

16. Эталонду сактоо жана колдонуу эрежелери төмөнкү маалыматтарды камтууга тийиш:

1) эталондун курамын жана багытын;

2) айлана-чөйрөнүн параметрлерине (температура, басым, нымдуулук ж.б.) карата талаптарды;

3) эталондун иштөөсү үчүн зарыл болгон инженердик коммуникацияларга карата талаптарды;

4) эталонду калибрлөөнүн жана салыштыруунун мезгилдүүлүгүн;

5) эталон менен иштөөдөгү коопсуздук талаптарын;

6) эталонду ташуунун эрежелерин.

17. Эталонду улуттук катары бекитүүгө өтүнмө эксперттик комиссия тарабынан каралат.

18. Эксперттик комиссия өлчөө бирдиктүүлүгүн камсыз кылуу боюнча мамлекеттик орган тарабынан түзүлөт.

19. Эксперттик комиссиянын курамына өлчөө бирдиктүүлүгүн камсыз кылуу боюнча мамлекеттик органдын, метрология боюнча улуттук органдын жана анын аймактык бөлүмдөрүнүн, ошондой эле юридикалык жактардын метрологиялык кызматтарынын өкүлдөрү киргизилет. Эксперттик комиссиянын төрагасы өлчөө бирдиктүүлүгүн камсыз кылуу боюнча мамлекеттик органдын кызмат адамдарынын арасынан дайындалат.

20. Эксперттик комиссия тарабынан документтерди кароонун мөөнөтү эталонду улуттук катары бекитүү үчүн документтер алынган күндөн тартып 30 календардык күндөн ашык эмес мөөнөттү түзөт.

21. Эксперттик комиссия берилген документтерге экспертиза жүргүзөт. Экспертизанын жыйынтыгы боюнча эксперттик комиссия жеринде төмөнкүлөрдү баалайт:

1) эталондун курамын жана жайгашуусун;

2) эталонду сактоо жана колдонуу шарттарын;

3) эталондун мүнөздөмөлөрүн изилдөөнүн жыйынтыктарын;

4) эталонду салыштыруунун жыйынтыктарын;

5) физикалык чоңдуктун бирдигинин эл аралык системасына карата эталонго байкоо жүргүзүүнү.

22. Эксперттик комиссиянын улуттук эталонду бекитүү мүмкүндүгү (мүмкүн эместиги) жөнүндө корутундусу өлчөө бирдиктүүлүгүн камсыз кылуу боюнча мамлекеттик орган тарабынан бекитилген форма боюнча түзүлөт.

23. Эксперттик комиссиянын оң корутундусунун негизинде өлчөө бирдиктүүлүгүн камсыз кылуу боюнча мамлекеттик орган өзүнүн буйругу менен эталонду улуттук катары бекитет.

24. Эксперттик комиссия тарабынан терс корутунду кабыл алынган учурда өлчөө бирдиктүүлүгүн камсыз кылуу боюнча мамлекеттик орган арыз ээсине эталонду бекитүүдөн баш тартуу жөнүндө жазуу жүзүндөгү негиздемени жөнөтөт.

3-глава. Кыргыз Республикасынын улуттук эталондорунун мамлекеттик реестрин жүргүзүү тартиби

25. Бекитилген эталондор каттоого жана эсепке алынууга тийиш.

26. Улуттук эталондорду каттоо өлчөө бирдиктүүлүгүн камсыз кылуу боюнча мамлекеттик органдын буйругунун негизинде метрология боюнча улуттук орган тарабынан Кыргыз Республикасынын улуттук эталондорунун мамлекеттик реестрине улуттук эталондор жөнүндө маалыматтарды киргизүү аркылуу жүзөгө ашырылат.

27. Кыргыз Республикасынын улуттук эталондорун каттоодо "KG 417", "НЭ" индекстеринен, каттоонун катар номеринен, эталон бекитилген жылдын акыркы эки цифрасынан турган, тире менен ажыратылган белгилер ыйгарылат.

Жазууга мисалы: - KG 417.НЭ.000-00

1) KG 417 - Дүйнө өлкөлөрүнүн мамлекеттер аралык классификатору боюнча Кыргыз Республикасынын коду;

2) НЭ - Кыргыз Республикасынын улуттук эталону;

3) 000 - каттоонун катар номери;

4) 00 - улуттук эталон катталган жылдын акыркы эки цифрасы.

28. Кыргыз Республикасынын улуттук эталондорунун мамлекеттик реестри электрондук форматта жүргүзүлөт.

29. Кыргыз Республикасынын улуттук эталондорунун мамлекеттик реестрине киргизилген Кыргыз Республикасынын улуттук эталондору жөнүндө расмий маалымат өлчөө бирдиктүүлүгүн камсыз кылуу боюнча мамлекеттик органдын жана метрология боюнча улуттук органдын сайттарында жайгаштырылат.



Предложения по улучшению сайта
Онлайн кайрылуу