КЫРГЫЗ РЕСПУБЛИКАСЫНЫН ӨКМӨТҮНҮН ТОКТОМУ

Бишкек шаары, 2011-жылдын 7-апрели N 143

Банкроттук процессинин жол-жоболорун ишке ашыруучу администраторлордун отчетторун берүү боюнча нускаманы бекитүү жөнүндө

Кыргыз Республикасынын 2010-жылдын 15-октябрындагы N 74 "Банкроттук (кудуретсиздик) жөнүндө" Мыйзамынын 17-беренесин ишке ашыруу максатында Кыргыз Республикасынын Өкмөтү токтом кылат:

1. Банкроттук процессинин жол-жоболорун ишке ашыруучу администраторлордун отчетторун берүү боюнча тиркелген нускама бекитилсин.

2. Бул токтом 2011-жылдын 1-январынан тартып күчүнө кирет.

3. Бул токтом расмий жалпыга маалымдоо каражаттарында жарыялансын.

4. Бул токтомдун аткарылышын контролдоо Кыргыз Республикасынын Өкмөтүнүн Аппаратынын экономика жана стратегиялык өнүктүрүү бөлүмүнө жүктөлсүн.

Банкроттук процессинин жол-жоболорун ишке ашыруучу администраторлордун отчетторун берүү боюнча
 НУСКАМА

(КР Өкмөтүнүн 2019-жылдын 22-августундагы № 421 токтомунун редакциясына ылайык)

I. Жалпы жоболор

1. Бул Нускама "Банкроттук (кудуретсиздик) жөнүндө" Кыргыз Республикасынын Мыйзамына жана Кыргыз Республикасынын Өкмөтүнүн 1998-жылдын 30-декабрындагы N 865 токтому менен бекитилген Банкроттук процессинин жол-жоболорун колдонуу тартиптери жөнүндө эрежелерге ылайык иштелип чыккан жана банкроттук процессинин жол-жоболорун ишке ашыруучу администраторлордун отчетторунун берүүнүн мазмунун, мөөнөтүн жана тартибин аныктайт.

2. "Банкроттук (кудуретсиздик) жөнүндө" Кыргыз Республикасынын Мыйзамынын 70-беренесине ылайык атайын администратор банкроттук жөнүндө иштер боюнча мамлекеттик органдын алдында отчёт берүүгө милдеттүү.

"Банкроттук (кудуретсиздик) жөнүндө" Кыргыз Республикасынын Мыйзамынын 103-беренесине ылайык эгерде ушул бөлүмдө жана реабилитация планында башкача каралбаса, тышкы башкаруучу атайын администратордун укуктарынан жана милдеттеринен пайдаланат.

"Банкроттук (кудуретсиздик) жөнүндө" Кыргыз Республикасынын Мыйзамына ылайык банкроттук иштер боюнча мамлекеттик орган Кыргыз Республикасынын мыйзамдарынын талаптарын банкроттук процессинде администраторлордун аткаруусун, администраторлордун отчёттук маалыматтарды жыйноосун контролдойт жана ага болгон талаптарды бекитет.

Бул Нускамада "администраторлор" термини атайын администраторду жана тышкы башкаруучуну түшүндүрөт.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

3. Ушул Нускамада белгиленген тартипте, банкроттук жөнүндө иштер боюнча мамлекеттик органга отчет түшкөн учурдан тартып, администраторлордун отчету берилди деп эсептелет.

4. Отчеттун толук мазмуну, берүү мөөнөтү жана туура толтурулушу үчүн карызкордун администратору тикеден-тике жеке жоопкерчилик тартат. Администраторлордун отчеттору ушул Нускама менен белгиленгендей, көктөлүп тигилип жана номер коюлуп, ошондой эле администратордун мөөрү басылып жана колу коюлушу керек. Башка адам тарабынан күбөлөндүргөн отчет кабыл алынбайт. Карызкорду реструктуризациялоо процессинде кайта түзүлгөн юридикалык жак боюнча берилүүчү отчет ошондой эле анын жетекчиси жана бухгалтери тарабынан күбөлөндүрүлөт.

Эгерде банкроттук жөнүндө иштер боюнча мамлекеттик органдын кызматкери тарабынан берилген отчеттордон каталар табылган учурда, администраторлор каталарды оңдоп жана каталардын бар экендиги жөнүндө билдиргенден кийин оңдолгон отчетту 2 жумуш күндүн ичинде жиберүүгө милдеттүү.

Отчёт бербесе же өз убагында бербесе, ошондой эле отчётторду туура эмес берсе, администратор Кыргыз Республикасынын Бузуулар жөнүндө кодексине ылайык жоопкерчилик тартат.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

II. Администраторлордун отчеттун мазмунуна, тартибине жана берүү мөөнөтүнө талаптар

6. Карызкордун банкроттук процессин жүргүзүүдө администраторлор банкроттук жөнүндө иштер боюнча мамлекеттик органга төмөнкүдөй отчет берет:

- финансылык абалдын баштапкы талдоосу;

- мүлктү инвентаризациялоо жана баалоо жыйынтыктары боюнча отчет;

- кварталдык отчеттору;

- ачык тоорукту жүргүзүү жыйынтыгы боюнча;

- корутунду отчет.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

7. Финансылык абалдын баштапкы талдоосу Банкроттук процессинин жол-жоболорун колдонуу тартиби жөнүндө эрежеде белгилеген талаптарга ылайык берилет.

Финансылык абалдын баштапкы талдоосунда статистикалык бирдик жана юридикалык жак катары каттоодон өткөндүгү жөнүндө күбөлүктүн көчүрмөсүн берүү менен ишкананын (аталышы, юридикалык статусу, юридикалык дареги, ОКПО коду, иш-аракеттеринин түрү, почталык дареги) так реквизиттери көрсөтүлүшү зарыл. Ошондой эле отчетто карызкордун уюштуруучусу (катышуучусу), ар бир уюштуруучунун (катышуучунун) үлүштөрүн көрсөтүү менен уставдык капиталдын өлчөмү көрсөтүлүп, ошондой эле уюштуруу документтеринин көчүрмөсү да берилиши керек.

Карызкордун финансылык абалынын баштапкы талдоосунда банкроттук процесстин чыгашаларын жабуу үчүн карызкордун активдеринин жетиштүүлүгүн, карызкордун төлөөгө жөндөмдүүлүгүн калыбына келтирүү боюнча мүмкүнчүлүктөрүн (өндүрүштүк жана финансылык көрсөткүчтөрдүн талдоосу, инвестицияларды тартуу мүмкүнчүлүктөрү), банкроттуктун себептерин жана алдын ала ниет кылган жана жалган банкроттуктун көрсөткүчтөрүн талдоо камтылышы керек.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

8. Карызкордун мүлкүн инвентаризациялоо жана активдерин баалоо жыйынтыктары боюнча отчет инвентаризациянын жана мүлктү баалоо бүткөн күндөн бир жумалык, бирок администраторду дайындагандан кийин эки айдан кем эмес мөөнөттө берилиши керек.

Карызкордун мүлкүн инвентаризациялоо жана активдерин баалоо жыйынтыктары боюнча отчетуна карызкордун мүлктүк активдеринин баалоо актылары, ага тышкы адистерди (эксперттерди) тарткан учурда алардын чыгарган корутундусу тиркелиши керек.

Аталган отчет төмөнкүлөрдү камтыш керек:

1) жоюлуу массасына киргизилбеген мүлктү (күрөөгө коюлган мүлк, кайта берилүүчү үчүнчү жактын мүлкү, жүгүртүүдөн алып салынган мүлк) көрсөтүү менен жоюлуу массасын талдоону;

2) өндүрүштү; же өндүрүштүн бөлүгүн сактоо максатка ылайыктулуугу жөнүндө корутунду, анын ичинде карызкорду реабилитациялоо же реструктуризациялоо жүргүзүү жолу менен (ишкананын өндүрүштүк кубаттуулугун пайдаланууну, мүлктүк активдердин бөлүшүн, жүгүртүлүүчү активдердин бөлүшүн, салттуу жабдуучуларды жана керектөөчүлөрдү, продукцияларды сатуу рыногун талдоо ж.б.);

3) өндүрүп алуу боюнча мүмкүнчүлүктөрдү көрсөтүү менен дебитордук карыздардын талдоосу;

4) кезектүүлүгүнө ылайык кредиторлордун бекитилген реестрин тиркөө менен администратор тааныган кредитордук карыздардын талдоосу;

5) ишкананын акчалай активдеринин талдоосу (банктарда эсептердин болушу);

6) ишкананын эмгек ресурстарынын талдоосу (иштегендердин санынын сакталышы);

7) инвентаризациянын жүрүшүндө табылган кем чыгууну талдоо, көрсөтүлгөн фактылар боюнча көрүлгөн чаралар жөнүндө отчет.

9. Кварталдык отчёттор отчёттук кварталдан кийинки айдын 1инен кечиктирилбей берилет. Кварталдык отчёттор жазуу түрүндө берилет жана кредиторлордун чогулушунун протоколдорунун көчүрмөсүн тиркөө менен отчёттук мезгилде жүргүзүлгөн бардык иш-аракеттер жөнүндө, жүргүзүлгөн тооруктар жана кредиторлордун талабын канааттандыруу жөнүндө маалыматтарды ж.б. камтыйт. Квартал сайын берилүүчү тиркемелердеги көрсөткүчтөр өлчөө бирдиктерин так көрсөтүү менен банкроттук процессинин башталышынан тартып өсүүчү жыйынтыктар менен чагылдырылат.

Кварталдык отчеттор банкроттук процессинин жол-жоболорун натыйжалуу колдонууну аныктоо жана кредиторлордун талаптарын кыйла толук канааттандыруу боюнча чараларды аныктоо максатында түзүлөт.

Кварталдык отчеттор төмөнкүлөрдү камтышы керек:

1) кредиторлордун талабын канааттандырууну талдоону;

2) дебитордук карыздарды өндүрүүнү талдоону;

3) карызкордун мүлктүк активдерин ээликтен ажыратуу (сатуу, өткөрүп берүү), анын ичинде күрөөгө коюлган мүлктү талдоону;

4) банкроттук процессинин чыгашаларын талдоону;

5) банкроттук процессинин чыгашаларын төлөө үчүн каражаттын жетиштүүлүгүн жана кредиторлор менен эсептешүүнү талдоону;

6) реструктуризациялоо чегинде түзүлгөн ишканалар боюнча маалыматтарды;

7) реабилитациялоо, санациялоо пландарын аткаруу боюнча маалыматтарды;

8) карызкордун жетекчилеринин иштери жөнүндө маалымат жана аларды жоопкерчиликке тартуу боюнча администратор тарабынан көрүлгөн чараларды.

Отчётко милдеттүү түрдө ушул Нускаманын 1-6-тиркемелерине ылайык документтер берилиши керек.

Тиркемелердеги көрсөткүчтөр жана маалыматтар толук болуп саналбайт жана зарылдыкка жараша администратор тарабынан толукталышы мүмкүн.

Реструктуризациялоо методу менен атайын администрациялоо жол-жобосун колдонууда администратор кварталдык отчёттон тышкары банкроттук иштер боюнча мамлекеттик органга түшүндүрмө кат менен ушул жол-жобонун алкагында түзүлгөн жаңы юридикалык жактын бухгалтердик балансынын күбөлөндүрүлгөн көчүрмөсүн милдеттүү түрдө тапшырат.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

10. Ачык тоорук жүргүзүүнүн жыйынтыктары тууралуу отчёт аукцион жана конкурс өткөрүлгөндөн кийин он календардык күндөн кечиктирилбестен берилет. Отчётко ушул Нускаманын 3-тиркемесине ылайык документтер берилет.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

11. Реабилитациялоо жол-жобосун ишке ашырган тышкы башкаруучу банкроттук иштер боюнча мамлекеттик органга реабилитациялоонун бекитилген планынын көчүрмөсүн тапшырууга жана планды аткаруунун жыйынтыктары жөнүндө отчётту квартал сайын тапшырууга милдеттүү.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

12. Корутунду отчёт "Банкроттук (кудуретсиздик) жөнүндө" Кыргыз Республикасынын Мыйзамында жана Банкроттук процессинин жол-жоболорун колдонуу тартиби жөнүндө эрежеде белгиленген көлөмдө жана тартипте берилет.

(КР Өкмөтүнүн 2019-жылдын 22-августундагы № 421 токтомунун редакциясына ылайык)

1-тиркеме

Карызкор жөнүндө жалпы маалыматтар

(КР Өкмөтүнүн 2019-жылдын 22-августундагы № 421 токтомунун редакциясына ылайык)

2-тиркеме

Мүлктү инвентаризациялоонун жана баалоонун жыйынтыгы

(КР Өкмөтүнүн 2019-жылдын 22-августундагы № 421 токтомунун редакциясына ылайык)

3-тиркеме

Мүлктүк активдерди ээликтен ажыратуу

(КР Өкмөтүнүн 2019-жылдын 22-августундагы № 421 токтомунун редакциясына ылайык)

4-тиркеме

Отчеттук датага кредитордук карыздын толук реестри

(КР Өкмөтүнүн 2019-жылдын 22-августундагы № 421 токтомунун редакциясына ылайык)

5-тиркеме

Банкроттук процесстин чыгымдары

(КР Өкмөтүнүн 2019-жылдын 22-августундагы № 421 токтомунун редакциясына ылайык)

6-тиркеме

Банкроттук процесстин жол-жобосун жүргүзүүнүн натыйжалары

(КР Өкмөтүнүн 2019-жылдын 22-августундагы № 421 токтомунун редакциясына ылайык)