20-июнда Бишкекте Кыргыз Республикасынын Экономика жана коммерция министрлиги «ЕАЭБге мүчө мамлекеттердин соода-транзиттик потенциалын ишке ашыруунун стратегиялык багыты катары транспорттук коридорлорду өнүктүрүү» деген темада тегерек стол уюштурду. Иш-чара Энергетика жана инфраструктура министри Арзыбек Кожошев баштаган Евразия экономикалык комиссиясынын өкүлдөрүнүн колдоосунда өттү.

Модератор катары министрдин орун басары Назарбек Малаев катышты.

Министр куттуктоо сөзүн сүйлөдү жана өз сөзүндө катышуучулардын көңүлүн ЕАЭБ транспорт тармагындагы жаңы чакырыктарга жана тенденцияларга бурду жана Евразиялык биримдикте инфраструктураны өнүктүрүүнүн жана логистикалык чаралардын натыйжалуулугун жогорулатуу боюнча ЕЭКтин иши жөнүндө маалымат берди.

«Биз Биримдик өлкөлөрүнүн жана биздин региондогу өнөктөштөрүбүздүн эл аралык транспорттук-логистикалык инфраструктураны өнүктүрүүгө багытталган улуттук аракеттерин белгилеп, жогору баалайбыз, биз салттуу эл аралык коридорлорду диверсификациялоо процессин байкап жатабыз», - деп баса белгиледи Арзыбек Кожошев.

Тегерек столдо ЕАЭБ алкагында транспорт жана логистика тармагында аткаруу бийлигинин мамлекеттик органдарынын, бизнес-коомчулугунун, Борбордук Азиянын өнүктүрүү институттарынын жана Евразия экономикалык комиссиясынын өкүлдөрүнүн катышуусунда Кыргыз Республикасынын транспорттук-логистикалык потенциалы, ЕАЭБ мамлекеттеринин аймагы аркылуу товарларды (жүктөрдү) өткөрүүдөгү тоскоолдуктарды азайтуу жана башка актуалдуу маселелер боюнча баяндамалар угулду.