Чолпон-Атада эл аралык туристтик жарманке жана 2023-жылдын туристтик сезону ачылды

Новости
13-Май 2023-ж.
941

2023-жылдын 13-майында Чолпон-Ата (Ысык-Көл облусу), Ч.Айтматов атындагы Рух-Ордо маданий борборунда Жогорку Кеңештин төрагасы Нурланбек Шакиевдин, КР экономика жана коммерция министри  Данияр Амангелдиев жана башка расмий адамдардын катышуусунда Ысык-Көл эл аралык туристтик көргөзмө-жарманкесинин жана 2023-туристтик сезондун ачылышы болуп өттү. 


Мекендештерге, Ысык-Көл облусунун тургундарына жана ардактуу конокторго куттуктоо сөзүн сүйлөп жатып, министр Данияр Амангелдиев «Кыргызстан тарыхы, жаратылышы жана кайталангыс маданияты менен туризмди өнүктүрүүгө чоң потенциалы бар өлкө. Маалым болгондой, туризм экономиканы өнүктүрүүгө жагымдуу шарттарды түзүп, жумуш орундарын камсыз кылат, жергиликтүү тургундардын жашоо шартын жакшыртат. Ошондуктан, биз өлкөнүн имиджин көтөрүү, туризмди туруктуу өнүктүрүү жана анын инфраструктурасын жакшыртуу боюнча көптөгөн активдүү кадамдарды жасап жатабыз», - деди министр.


Анын айтымында, учурда Кыргызстандын туризм тармагы динамикалык темп менен өнүгүп, өлкө экономикасынын приоритеттүү тармактарынын бирине айланууда. Бүткүл дүйнөлүк туризм уюмунун (ЮНВТО) маалыматы боюнча 2022-жылы дүйнөлүк туризм пандемия мезгилине салыштырмалуу 63% калыбына келип, 2022-жылы Дүйнөлүк туристтик уюмдун классификациясына киргизилген Кыргызстандын аймагына алыскы жана жакынкы чет өлкөлөрдөн келген жарандардын жалпы саны 6 912 557 адамды түздү. Бул акыркы жылдарга салыштырмалуу үч эсе көп.


Туризм тармагында жагымдуу шарттарды түзүү максатында биз тиешелүү мамлекеттик органдар, жеке сектор жана эл аралык өнөктөштөр менен тыгыз кызматташып жатабыз.

Ошентип, өнөктөштөр менен биргеликте туризм тармагына тиешелүү мыйзамдар тармагын өркүндөтүү боюнча жигердүү иштер жүргүзүлдү. “Туризм жөнүндө” КР мыйзамына өзгөртүүлөрдү киргизүү тууралуу мыйзам долбоору иштелип чыгып, учурда Жогорку Кеңештин кароосуна коюлду. Мындан тышкары, Жер кодексинин жаңы редакциясына туризм тармагындагы жер маселелери боюнча сунуштар даярдалды.


Системалык аналитикалык иштеп чыгуу жана маркетинг багытында да жигердүү иштер жүргүзүлүүдө. Ошону менен бирге туристтик бизнесте бирдиктүү салык режими киргизилип, келечекте бир катар салык жеңилдиктери киргизилет.


Туризмдин инфраструктурасы тууралуу айта турган болсок, туристтер үчүн ыңгайлуу шарттарды түзүү үчүн атайын туризмди өнүктүрүү фонду түзүлүп, анын алкагында бир катар стратегиялык маанилүү инфраструктуралык иштер жүргүзүлүүдө.


Министрдин айтымында, өлкөнүн аймактарында 68 туристтик эс алуу жайларын куруу пландалып, учурда 21 эс алуу жайлары курулуп жатат, алар быйылкы туристтик сезондо пайдаланууга берилиши керек. Калган 47 объектинин да жайгашкан жери аныкталып, алардын курулушу улантылат.


Борбор калаага жакын жайгашкан Аламүдүн районунда «Байтик Mountain Resort» тоо-туристтик кластери» инвестициялык долбоору ишке ашырылууда. Бул Борбор Азиядагы эң ири туристтик аймактардын бири болору күтүлүүдө.


Ошондой эле, министр Ысык-Көл районунун Тосор айылында эл аралык спорт комплексинин курулушу тынымсыз жүрүп жатканын билдирди. Өткөн жылы GOU BAS ыңгайлуу туристтик автобусту ишке киргизилди. Белгилүү болгондой, бул долбоордун иши боюнча оң пикирлер бар.


Республикада 2 локалдык геопарк (Баткен районундагы Мадыген, Ысык-Көл облусунда «Тескей») түзүлдү жана жакынкы келечекте кийинки парктар ачылат. Учурда Кыргызстандын геопарктарын ЮНЕСКОнун глобалдык геопарктарынын тизмесине киргизүү боюнча тиешелүү иштер жүргүзүлүүдө. 


Мындан тышкары, Жарандык авиация агенттиги менен тыгыз кызматташуунун негизинде 2023-жылдын июнь айынан баштап Абу-Даби-Бишкек-Абу-Даби жана Сеул багыттары боюнча Wizz Air Abu Dhabi лоукостерлин авиакомпаниясынын жана Кореянын Tway авиакомпанияларынын каттамдарын көбөйтүү каралууда. Бишкек-Сеул багыты боюнча аба каттамдарын ачуу боюнча келишим түзүлдү. Учурда өлкө 33 багытка 48 туруктуу эл аралык каттамдарды аткарат.


Жыйынтыгында министр Ысык-Көл кыргыз туризминин борбору экенин, анткени көлдүн касиеттери жергиликтүү, жакынкы жана алыскы өлкөлөрдөн келген туристтерди өзүнө тартып, алар атайын туристтик жай менен таанышып, сууга түшүп, ден соолугун чыңдамакчы. Демек, азыркы иш-чаранын Ысык-Көлдө болуп жатканы таң калыштуу эмес.


Мүмкүнчүлүктөн пайдаланып, министр өлкөнүн экономикасына кошкон салымы үчүн туризм бизнесинин өкүлдөрүнө ыраазычылык билдирди. Ал ошондой эле министрликтердин жана ведомстволордун, жергиликтүү өз алдынча башкаруу органдарынын жетекчилерине, туризм тармагында эмгектенген жарандарга кайрылып, бүгүн келген туристтердин жеке коопсуздугун камсыздап, сапаттуу тейлөөнү камсыз кылсак, эртең биз  туристтердин эки эсе көп келиши үчүн бардык шарттарды түзөбүз деп белгиледи.


Ошондой эле, Ысык-Көл ITF 2023 көргөзмөсүнө келгендер туристтик компаниялардын, пансионаттардын, эс алуу үйлөрүнүн жана башка туризм тармагында иштеген уюмдардын товарлары жана кызматтары менен таанышып, этно оюндарга, кол өнөрчүлөр үчүн мастер-класстарга катыша алышты жана маданий программаны көрүштү.


Маалымат жыйынынын жүрүшүндө министр Д.Амангелдиев журналисттердин суроолоруна жооп берди.

Предложения по улучшению сайта
Онлайн кайрылуу