Бишкекте Глобалдык Жашыл Өнүгүү Институтунун (GGGI) катышуусунда тематикалык облигацияларды талкуулоого арналган биринчи иш-чара өттү. Бул иш-чара КР Экономика жана коммерция министрлигинин, кызыкдар мамлекеттик органдардын, каржы секторунун өкүлдөрүнүн жана өнүктүрүү боюнча өнөктөштөрдүн катышуусунда өттү.

Бул иш-чарада GGGI штаб-квартирасынын (Сеул, Түштүк Корея) өлкөнүн портфолио боюнча улук кызматкери Оюнчимэг Амартүвшин айым катышуучуларга GGGI ишмердүүлүгү, экологиялык, социалдык жана корпоративдик башкаруунун (ESG) принциптери жана жашыл экономикалык өсүш үчүн каражаттарды тартуу практикасы тууралуу маалымат берди.

Ошондой эле катышуучулар жашыл каржылоо, социалдык туруктуулук жана инклюзивдүүлүк жаатындагы тематикалык бонддор (облигациялар) боюнча пикир алмаша алышты, ошондой эле GGGI менен кызматташууга өзгөчө кызыгуу көрсөтүштү. Атап айтканда, банк секторунун өкүлдөрү тематикалык облигацияларды чыгарууда кызматташууга кызыкдар экендиктерин билдиришти.

Министрдин орун басары Канат Абдрахманов белгилегендей, учурда өлкөдө туруктуу жашыл каржылоону тартуу механизмин түзүү, жашыл долбоорлорду, атап айтканда, каржы секторун илгерилетүү жана банк секторуна климаттык каржылоону тартуу маселеси активдүү жүрүп жатат.

Министрдин орун басары ошондой эле GGGI климаттык фонддордон каражаттарды тартууга өзгөчө салым кошуп жатканын баса белгилеп, Кыргызстанда GGGI кеңсесин ачуу боюнча жетишилген макулдашуулар тууралуу маалымат берди, бул кызматташтыкты жаңы сапаттык деңгээлге чыгарат.