Кыргыз Республикасынын BMWK менеджментин окутуу программасынын алкагында ийгиликтүү герман-кыргыз экономикалык кызматташтыгынын 15 жылдыгына арналган иш-чара болуп өттү.
Бул иш-чара Кыргыз Республикасынын Экономика жана коммерция министрлигинин, Германиянын Экономика жана климатты коргоо федералдык министрлигинин, Германиянын Эл аралык кызматташтык коомунун (GIZ), Кыргыз Республикасынын Соода-өнөр жай палатасынын катышуусунда өттү жана ага Кыргызстандын бизнес коомчулугунун өкүлдөрү катышты.
Программанын Кыргызстан, Өзбекстан жана Казакстандан келген бүтүрүүчүлөрү Германияда стажировкадан өтүү тажрыйбасы жана жетишкен натыйжалары менен бөлүшүштү. Программанын алкагында катышуучулар Германиянын рыногу менен таанышууга, Германиянын ишканалары менен ишкер байланыштарды түзүүгө жана узак мөөнөттүү өнөктөштүк мамилелерди түзүүгө мүмкүнчүлүк алышты.
Кыргыз Республикасы менен Германиянын ортосунда программаны 2025-жылга чейин узартуу боюнча макулдашууга жетишилди.
Ошентип, 30-ноябрда Башкаруучу кадрлардын квалификациясын жогорулатуу программасы боюнча немис-кыргыз башкаруу комитетинин биринчи жыйыны болуп өттү.
Кыргыз делегациясын КР Экономика жана коммерция министринин орун басары Канат Абдрахманов жетектеди.
Бул жумушчу жолугушууда тараптар Программанын жетишкен натыйжаларына жогору баа беришти, ошондой эле мындан аркы кызматташуунун артыкчылыктуу багыттарын белгилешти.
Министрдин орун басары К.Абдрахманов программа Кыргызстандын экономикасын өнүктүрүүнүн приоритеттүү багыттары менен кантип интеграцияланып жаткандыгы тууралуу маалымат берип, ошондой эле анын бизнес чөйрөсүн өнүктүрүү, адам ресурстарынын потенциалын түзүү жана өлкөлөр ортосундагы байланышты чыңдоо үчүн маанисин белгиледи.
Министрдин орун басары ошондой эле кыргыз тараптын жеке жана мамлекеттик ишканалардын деңгээлинде жогорку технологиялык тажрыйбаны берүүгө, бизнес секторун санариптештирүүгө, аялдардын ишкердигин жана өлкөнүн аймактарынан келген ишкерлерди колдоого кызыкдар экендигин баса белгиледи. Ошол эле учурда климат маселеси негизги бойдон калууда, ал эми жеке сектор өзгөчө маанилүү ролду ойнойт.
«Кыргыз Республикасынын Экономика жана коммерция министрлиги жашыл экономика саясатын иштеп чыгуу боюнча борбордук орган катары энергияны үнөмдөөчү технологияларды колдонууда жеке секторду стимулдаштыруу үчүн германиялык тарап менен тажрыйба алмашуу жаатында кызматташууга ачык», - деп баса белгиледи министрдин орун басары.
Германиянын Экономика жана климатты коргоо федералдык министрлигинин өкүлдөрү башкаруучу кадрлардын квалификациясын жогорулатуу программасынын алкагында жашыл экономика багытында кызматташуу демилгесин колдошту.
Тактап айтканда, жашыл индустрияны, альтернативдик энергия булактарын, энергияны үнөмдөө жана тоо-кен тармагын өнүктүрүүгө маани беришти. Ошондой эле эки өлкөнүн министрликтеринин ортосунда түз байланыш түзүү демилгесин билдиришти.
Жолугушуунун жыйынтыгында тараптар 2023-жылдан 2025-жылга чейин башкаруучу кадрлардын квалификациясын жогорулатуу программасын улантуу ниети жөнүндө макулдашууга кол коюшту.
