2022-жылдын 30-мартынан 1-апрелине чейин ДСУнун (Дүйнөлүк Соода Уюмунун) Штаб-квартирасында Кыргыз Республикасы Пакистан Ислам Республикасынын Соода саясатынын серепине катышты.

Бул тууралуу КР Экономика жана коммерция министрлигинин Дүйнөлүк соода уюмундагы өкүлү Нурбек Максүтов билдирди.

Н.Максутов Пакистандын Соода министри Мухаммад Суале Ахмад Фарух баштаган делегациясын жылуу кабыл алып, ДСУнун Катчылыгы менен бирге даярдалган баяндаманы бергени үчүн ыраазычылык билдирди.

Ал ошондой эле Пакистан өкмөтүнүн COVID-19 пандемиясына каршы натыйжалуу күрөшүн белгиледи, анын натыйжасында экономика 2019-2020-жылдары 0,5%га бир аз төмөндөп, 2021-жылы 4% өсүш калыбына келтирилген. Бул кризис Пакистандын Соода саясаты стратегиясын (2020-2025) өз убагында ишке ашырууга таасирин тийгизген жок.

Эки тараптуу мамилелерге токтолуп, өкүл белгилегендей, Кыргыз Республикасы менен БАЭ ортосунда дипломатиялык мамилелер 1992-жылдын 10-майында түзүлүп, Пакистан Кыргыз Республикасынын эгемендүүлүгүн биринчилерден болуп тааныган өлкөлөрдүн бири болгон. Ошол эле жылы өлкөлөр Экономикалык кызматташтык уюмунун алкагында активдүү кызматташа башташты. Ошондон бери өлкөлөр акырындап эки тараптуу соода-экономикалык кызматташтыкты өнүктүрүү багытында бара жатышат. Тактап айтканда, келишимдик жана институционалдык база түзүлдү (Соода-экономикалык кызматташтык боюнча өкмөттөр аралык кыргыз-пакистан комиссиясы).

Н.Максүтов белгилегендей, эки мамлекет тең достук мамилени сактап турганы менен эки тараптуу ишкердик жана экономикалык байланыштар талаптагыдай өнүгө элек. Негизги көйгөй - өлкөлөр ортосунда жүк ташуу үчүн инфраструктуранын жоктугу. Бул контекстте Кытайдын “Бир алкак, бир жол” демилгесинин алкагында ишке ашыруунун активдүү фазасында турган Кытай-Пакистан экономикалык коридорун пайдалануу белгиленди.

«Биргелешкен аракет менен гана өлкөлөр ортосундагы сооданын көлөмүн көбөйтүүгө болот. Бул үчүн бизнес менен бизнес-ассоциациялардын ортосундагы байланышты түзүп, өз ара продукцияларды, B2B жана B2G деңгээлиндеги иш-чараларды, өз ара көргөзмөлөрдү көрсөтүү жана рынокко чыгаруу зарыл», - деп баса белгиледи Н.Максүтов.

Соңунда ал Кыргызстан Пакистан менен эки тараптуу кызматташуунун бардык багыттары боюнча мамилелерди өнүктүрүүгө жана бекемдөөгө кызыкдар жана даяр экенин белгиледи. Мүмкүнчүлүктөн пайдаланып, ал Кыргыз Республикасынын атынан Пакистанга ДСУнун алкагындагы көп тараптуу талкууларга жигердүү жана конструктивдүү катышкандыгы үчүн ыраазычылык билдирди жана алардын делегациясына Соода саясатын ийгиликтүү кароону каалады.

Маалымат катары:

2021-жылы Кыргыз Республикасы менен Пакистандын ортосундагы соода жүгүртүү 8,945 миллион долларды түздү (экспорт – 1,205 миллион доллар, импорт – 7,743 миллион доллар). 2020-жылдын ушул мезгилине салыштырмалуу соода жүгүртүү 21,1%га өстү, анын ичинде импорт 42,6%га өстү, экспорт 36,8%га азайды.

Эскертүү:

Соода саясатын карап чыгуу механизми – бул ДСУнун бардык мүчө-өлкөлөрү тарабынан айрым өлкөлөрдүн соода саясатына жана алардын ДСУнун эрежелерине, нормаларына жана милдеттенмелерине ылайык келишине жамааттык мониторинг жүргүзүү системасы.

ДСУга мүчө мамлекеттердин соода саясатын үзгүлтүксүз карап чыгуунун максаты ДСУга мүчө мамлекеттердин соода саясатынын ачыктыгын жогорулатуу аркылуу көп тараптуу соода системасынын натыйжалуу иштешине көмөк көрсөтүү болуп саналат.

ДСУнун бардык мүчөлөрү соода саясатын карап чыгуу процессинен өтүшөт. Дүйнөлүк соодада эң чоң үлүшкө ээ болгон төрт мамлекет (Европа шериктештиги, АКШ, Япония жана Кытай) эки жылда бир процедурадан өтүшөт, андан кийин 16 мамлекет төрт жылда бир, калгандары алты жылда бир жолудан өтүшөт. Азыраак өнүккөн өлкөлөр үчүн узак мөөнөт аныкталышы мүмкүн.