2022-жылдын 23-мартында “Батыштын санкцияларын эске алуу менен Кыргызстан ЕАЭБде кандай өнүгөт” деген брифингде КР Экономика жана коммерция министринин орун басары Эльдар Алишеров Кыргызстандын Экономикалык Биримдиктин Төрагасы катары милдеттери тууралуу айтып берди. 

«Бул Кыргызстандын экинчи төрагалык мөөнөтү. Бул бизге эмне берет? Биз бардык структураларды жетектейбиз: министрлердин деңгээлинде да, жумушчу топтордо да. Биз Евразия экономикалык комиссиясынын коллегиясына жана ЕЭК Сотуна төрагалык кылбайбыз. Башка органдарда төрагалык кылуу биздин колубузда», - деди министрдин орун басары.

Анын айтымында, биринчи кезекте, Кыргызстан жыйынга модератордук кылууда. Кайсы багытта ишти күчөтүү керектигин аныктоо үчүн өлкө төрагалык кызматтын башында эле сунуштарды берүүгө укуктуу.

«Жылдын башында жалпыга маалымдоо каражаттарында төрагалык өлкө үчүн кандайдыр бир артыкчылыктарды бере алабы деген сөз болгон, бирок андай эмес. Союздун бардык органдарында бардык маселелер консенсус менен чечилет. Мисалы, башка түзүмдөрдө маселелер көпчүлүк добуш менен кабыл алынат, ал эми добуштар бирдей болгон учурда төраганын добушу чечүүчү болуп саналган жобо бар. 

ЕАЭБде бизде андай практика жок, бардыгы консенсус менен чечилет», - деп түшүндүрдү ал, Кыргызстандын ЕАЭБ төрагалыгынан кандайдыр бир артыкчылыктары бар-жокпу деген суроого жооп бергенде.

Министрдин орун басары ошондой эле адатта төрагалык кылуучу тараптын аймагында өткөрүлүүчү ЕАЭБ Эл аралык экономикалык форумун өткөрүү тууралуу кошумчалады. Буга чейин бул форум “Евразиялык жумалык” деп аталып келген.