Буга чейин Интернетте туура эмес маалымат тарап, анда Россиянын таасири менен Чехия компаниясына ГЭСтерди куруу иши берилбей жатканы айтылган.

Чакан гидроэлектростанцияларды куруу объективдүү себептерден улам токтотулганын Sputnik Кыргызстан агенттигине Экономика министрлигинин алдындагы инвестицияларды илгерилетүү боюнча агенттигинин маалымат бөлүмүнүн жетекчиси Уран Чекирбаев билдирди.

Буга чейин аталган министрлик өлкө боюнча 16 чакан ГЭС куруу демилгесин көтөргөн. Өткөн жылдын май айында долбоорду жүзөгө ашырууга Чехиянын Geen General Energy компаниясы кубаттуулугу 51 мегаваттык алты ГЭС курууга кызыкдар экенин билдирген. Ал эми үстүбүздөгү жылдын февраль айында чех компаниясы менен кубаттуулугу 107 мегаватт болгон дагы он чакан ГЭС куруу маселеси DS-Master Management сүйлөшүлгөн.

Долбоорду ишке ашыруу үчүн 190 миллион доллар каралган.

"Сүйлөшүүлөрдүн баштапкы этабында эле маселени оң жагына чечүүгө аракет кылдык. Ушуга байланыштуу өкмөт жер бөлүп берүү, куруучу компанияларга сынак жарыялоо иштери боюнча укуктук актыларды иштеп чыгып, атайын план түзүлгөн", — деди Чекирбаев.

Мурунку министрлер кабинети тендер маселесине байланыштуу чех компаниялары менен макулдашууларды убактылуу токтоткон.

Кийинчерээк долбоорду ишке ашырууга башка компаниялар кызыкдар экенин белгилүү болгон. Алардын бири катары Кытай компаниясын атоого болот. Мурунку өкмөт башчы Темир Сариев конкурс өткөрүү демилгесин колдоого алган.

"Чакан ГЭСтерди куруу боюнча тендер маселеси чечилбегендиктен долбоор убактылуу токтотулган. Кийинчерээк өкмөттүн курамы өзгөрүп, жаңы адамдар келди. Алар долбоорду улантышат", — деди Чекиров.

Анын айтымында, буга чейин интернетте туура эмес маалымат тарап, анда Россиянын таасири менен Чехия компаниясына ГЭСтерди куруу берилбей жатканы айтылган. Мындан сырткары, өкмөт үйүндө талаш маселелер бар деген да маалымат чыккан.

"Өкмөттүн ичинде долбоор боюнча талаш маселе жок. Чечим кабыл алууда башка өлкөнүн таасири бар деген да чындыкка жатпайт", — деди адис.

Ал долбоордун убактылуу токтотулушу маселени тыкыр иликтенип жатканына байланыштуу экенин баса белгиледи.