Евразия экономикалык жогорку кеңеши Евразия экономикалык биримдигинин жалпы финансы рыногун түзүү жана мыйзамдарды шайкеш келтирүүнүн негизги ыкмаларын аныктады. Бул чечим экономикалык интеграцияны тереңдетүүгө, ошол эле учурда улуттук финансы системаларынын туруктуулугун жана корголушун камсыздоого багытталган. 

Буйруктун негизинде жөнгө салуунун ар кандай деңгээлдеги (дифференцияланган) ыкмасы жатат. Ал ЕАЭБдин эл аралык келишимдеринде бекитилген, Биримдиктин жалпы рыногунда кызмат көрсөткөн финансылык уюмдарга карата шайкеш келтирилген талаптарды колдонууну карайт. Улуттук рыноктордо гана иштеген катышуучулар үчүн мүчө мамлекеттердин ички мыйзамдарынын ченемдери сакталат. 

Дифференцияланган ыкма интеграция менен улуттук финансы системаларын коргоонун ортосунда тең салмактуулукту камсыздайт, рыноктун катышуучулары үчүн түшүнүктүү эрежелерди түзөт жана финансылык кызматтардын жеткиликтүүлүгүн жана сапатын жогорулатат. 

Жаңы ыкма ошондой эле финансылык уюмдарга тандоо эркиндигин берет - ЕАЭБдин жалпы рыногуна чыгуу чечими өз мүмкүнчүлүктөрүнө жана экономикалык максатка ылайыктуулугуна жараша кабыл алынат.

Мындан тышкары, бул жыйында ЕАЭБге мүчө мамлекеттердин башчылары ЕАЭБге мүчө мамлекеттердин мунай жана мунай заттарынын жалпы рынокторун түзүү боюнча кызматташтыгынын негизги маселелерин талкуулашты. Мунай боюнча келишим 2027-жылдын 1-январында күчүнө кирет. 

Мамлекет башчылары мамилелерди макулдашуу боюнча жүргүзүлүп жаткан ишти белгилеп, андан ары аракеттерди координациялоонун маанилүүлүгүн баса белгилешти жана ЕАЭБде мунай жана мунай заттарынын туруктуу жана болжолдуу рыногун түзүүгө багытталган макулдашууларды ишке ашыруу боюнча биргелешкен ишти улантууга даяр экендиктерин ырасташты.