2025-жылдын 21-октябрында, Бишкекте, «Жашыл инновациялар жана гендердик теңчилик үчүн бирге» урааны алдында Борбор Азия регионалдык экономикалык кызматташтык программасынын (CAREC) алкагындагы аял ишкерлер форуму өттү.

Иш-чара Борбор жана Батыш Азия өлкөлөрүндө гендердик багыттагы жашыл инновациялардын өнүгүүсүн жана туруктуу өнүгүүнүн маселелерин талкуулоонун негизги аянтчасына айланды.

Форумга гендердик саясат жана жашыл технологиялар тармагындагы алдыңкы эксперттер, CAREC 2025 «Гендер жана жашыл инновациялар» сыйлыгынын лауреаттары, Региондук гендердик эксперттер тобунун өкүлдөрү, эл аралык өнүктүрүү боюнча өнөктөштөр, ошондой эле аймактагы аял ишкерлер катышышты.

Талкуулардын жүрүшүндө катышуучулар белгилешкендей, CAREC аймагында жашыл технологияларды өнүктүрүү аялдардын ден соолугуна байланышкан тобокелдиктерди азайтууга, акысыз эмгектин көлөмүн кыскартууга жана жаңы мүмкүнчүлүктөрдү жаратууга өбөлгө түзүүдө — жашыл жумуш орундарынан жана санариптик инструменттерден тартып аял ишкерлигин кеңейтүүгө чейин.

Өзгөчө көңүл жашыл инновациялардын системалуу өзгөрүүлөрдү камсыз кылуусуна, жамааттардын туруктуулугун чыңдоого жана CAREC аймагын туруктуу жана инклюзивдүү өнүгүү максаттарына жакындатуудагы маанисине бурулду.

Форум ишенимдүү жана шыктандырган атмосферада өтүп, тажрыйба алмашуу, жаңы өнөктөштүктөрдү түзүү жана жашыл экономикадагы аялдардын ролун чыңдоо боюнча биргелешкен чечимдерди издөө үчүн аянтча болду.

Иш-чара CAREC программасынын, ЕККУ академиясынын, БУУӨПтүн Кыргыз Республикасындагы өкүлчүлүгүнүн, ЕБРР, «Элдик Банк» жана «Юнисон» компаниялар тобунун колдоосу менен уюштурулду.

Бул форум аялдардын лидерлигин чыңдоодо, жашыл инновацияларды өнүктүрүүдө жана Борбор Азия аймагындагы туруктуу өнүгүү максаттарына жетүүдө маанилүү кадам болду.