Кыргыз Республикасынын экономика жана коммерция министринин орун басары Султан Ахматов Чыгыш экономикалык форумунун алкагындагы «Жергиликтүүнү глобалдыкка айлантуу: санариптик платформалар — чийки заттсыз экспорттун өсүшүнүн кыймылдаткыч күчү» аттуу панелдик сессияда сөз сүйлөдү.
Сөзүндө ал электрондук сооданы өнүктүрүү экспортту диверсификациялоонун стратегиялык багыты болуп саналарын жана чакан жана орто бизнести колдоонун натыйжалуу куралы экенин белгиледи. Султан Ахматов логистикалык инфраструктураны өнүктүрүү маселелерине өзгөчө көңүл бурду.
Атап айтканда, 2030-жылга чейинки Өнүктүрүү программасынын алкагында Кыргызстанда кеминде бир миллион чарчы метр кампалык жайлар түзүү пландалууда. Бул пландарга кошумча дем берип Кытай—Кыргызстан—Өзбекстан темир жол магистралын куруу долбоору заманбап транспорттук жана логистикалык коридорлорду калыптандыруу үчүн жаңы мүмкүнчүлүктөрдү ачат.
Белгиленген демилгелердин алкагында Кыргызстан Wildberries компаниясы менен биргеликте заманбап логистикалык борбор куруу долбоорун ишке ашырууну баштады. Болжолдорго ылайык, ушундай чечимдерди ишке киргизүү электрондук сооданын жылдык өсүшүн болжол менен 14 пайыз деңгээлде камсыздайт.
Сөзүнүн жыйынтыгында Султан Ахматов Кыргыз Республикасы санариптик соода инфраструктурасын ырааттуу өнүктүрүп жатканын жана эл аралык өнөктөштөр менен кызматташууну кеңейтүүгө ачык экенин баса белгиледи.
