Кыргыз Республикасынын экономика жана коммерция министринин орун басары Искендер Асылкулов бүгүн Чүй облусунун Ысык-Ата районунун Киргшелк айылында жайгашкан «Стилекс» ЖЧКсынын салтанаттуу ачылыш аземине катышты.

Алюминий профилдерин өндүрүү жана алюминий калдыктарын кайра иштетүү боюнча адистешкен бул ишканада 300–400гө жакын жумуш орду түзүлдү. Бул региондун экономикасын өнүктүрүүгө жана жергиликтүү калкты жумуш менен камсыз кылууга маанилүү салым кошот.

«Стилекс» ишканасынын өндүрүштүк кубаттуулугу жылына 1200 тонна алюминий профилин түзөт, ал эми алюминий калдыктарын кайра иштетүүнүн көлөмү 14 400 тоннага чейин жетет. Өндүрүлгөн продукция ички рынокко багытталгандыктан, импортко болгон көзкарандылыкты азайтууга жана ата мекендик продукциянын атаандаштыкка жөндөмдүүлүгүн жогорулатууга өбөлгө түзөт.

Жаңы ишкананын ачылышы Кыргыз Республикасынын өнөр жай саясатын ишке ашыруудагы маанилүү кадам болуп саналат. Ал улуттук өндүрүүчүлөрдү колдоого, өнөр жай тармагын өнүктүрүүгө жана жаңы жумуш орундарын түзүүгө багытталган.