Кыргыз Республикасынын экономика жана коммерция министри Бакыт Сыдыковдун чакыруусу менен Кыргыз Республикасына Ооганстан Ислам Эмиратынын Соода жана өнөр жай министринин милдетин аткаруучусу Ноуреддин Азизи баштаган делегация келди.

Жолугушууда Бакыт Сыдыков бул визит эки тараптуу кызматташууну активдештирүү жана тереңдетүү багытында маанилүү кадам экенин белгиледи. Кыргыз тарап экономиканын келечектүү тармактарын камтыган жаңы өз ара пайдалуу кызматташуу багыттарын издөө боюнча кызыкдар экенин билдирип, ооган тарапты жүргүзүлүп жаткан экономикалык реформалар жана өз ара сооданын көлөмүн көбөйтүү мүмкүнчүлүктөрү тууралуу маалымат берди.

Айрыкча көңүл санариптештирүү маселелерине бурулуп, кыргыз тарап топтогон тажрыйбасын Ооганстан өнөктөштөрү менен бөлүшүүгө даяр экенин билдирди.

Өз кезегинде Ноуреддин Азизи чакырууга ыраазычылык билдирип, эки тараптуу кызматташууну, анын ичинде соода-экономикалык жана инвестициялык чөйрөлөрдө кеңейтүү перспективаларын белгиледи.

Тараптар эки өлкөдө соода үйлөрүн ачуу боюнча макулдашышты.

Жолугушуунун жыйынтыгында төмөнкү документтерге кол коюлду:

• Кызматташууну өнүктүрүү боюнча жол картасы;

• Соода-экономикалык кызматташтык боюнча өз ара түшүнүшүү меморандуму.