Netflix эл аралык стриминг платформасында Кыргызстанда тартылган “Off Road” аттуу даректүү сериал жарык көрдү. Продюсердик компания Faraway Road Productions тарабынан тартылган бул долбоор Netflix’тин колдоосу менен ишке ашкан.

Сериалды тартуу иштери КР Экономика жана коммерция министрлиги, Туризм департаменти жана Туризмди өнүктүрүү фондунун тыгыз кызматташтыгы аркылуу ишке ашып, алар Кыргызстандын аймагындагы тартууларга өнөктөш болушту.

Сериалдын мазмуну — Бишкектен тартып, Ысык-Көл, Каракол жана башка кооз аймактарга чейин созулган кызыктуу автосаякат. Алты эпизоддон турган бул чыгарма көрүүчүлөрдү Кыргызстандын табияты, жашоо-турмушу, маданияты жана меймандостугу менен тааныштырат.

КР Министрлер Кабинетинин Төрагасынын орун басары Эдиль Байсалов төмөндөгүлөрдү белгиледи:

«"Off Road" сериалынан улам дүйнөнүн төрт бурчунан миллиондогон адамдар Кыргызстандын табиятындагы кооздуктар жана элибиздин салттуу меймандостугу тууралуу тааныша алышат деп абдан кубанып турабыз. Кыргызстанды тартуу жайы катары тандап алган продюсердик компанияга жана Netflix платформасына терең ыраазычылык билдиребиз. Кийинки жылы да өлкөнүн туристтик потенциалын даңазалаган бир нече фильм жана сериалдардын Netflix жана башка дүйнөлүк платформаларда чыгуусу күтүлүүдө».

Бул сериал — көрүү менен эле чектелбестен, саякатка шыктандыруучу чакырык. Кыргызстан бул жолу кадрдын четинде эмес, окуянын башкы каарманына айланган.

Маалымат үчүн: Off Road сериалы Netflix платформасында эл аралык аудитория үчүн жеткиликтүү.

Трейлер: https://youtu.be/gu6asa60uJE?si=ScvvICgWUwTPq7Ji