2025-жылдын 2-апрелинде Кыргыз Республикасынын экономика жана коммерция министри Бакыт Сыдыков эл аралык рейтингдик агенттик Fitch Ratings Inc. аналитиктери менен Кыргыз Республикасына суверендүү кредиттик рейтинг ыйгаруу маселелерин талкуулады.
Жолугушуунун жүрүшүндө Кыргыз Республикасынын социалдык-экономикалык өнүгүүсүнүн негизги көрсөткүчтөрү, жүргүзүлгөн реформалар жана экономикалык саясаттын стратегиялык приоритеттери тааныштырылды.
Өзгөчө көңүл инвестицияларды тартууга, инфраструктураны модернизациялоого жана ишкердик чөйрөнү жакшыртууга багытталган негизги реформаларга бурулду. Алардын арасында мамлекеттик башкарууга санариптик инструменттерди киргизүү, өнөр жай потенциалын активдүү өнүктүрүү, стратегиялык тармактар үчүн салыктык жеңилдиктер жана инвесторлордун кызыкчылыктарын коргоо боюнча укуктук жөнгө салууну өркүндөтүү иш-чаралары бар.
Бакыт Сыдыков Кыргыз Республикасынын Министрлер Кабинети макроэкономикалык туруктуулукту камсыз кылуу, калкты социалдык жактан коргоо жана атаандаштык чөйрөсүн өнүктүрүү боюнча ырааттуу иш-чараларды жүргүзүп жатканын белгиледи. Бул чаралар бизнес үчүн жагымдуу шарттарды түзүүгө, экспорттук мүмкүнчүлүктөрдү кеңейтүүгө жана өлкөнүн финансылык тутумун чыңдоого өбөлгө түзөт.
Ал Fitch рейтингдик агенттиги менен кызматташтык Кыргыз Республикасынын эл аралык имиджин мындан ары да бекемдөөгө жана анын инвестициялык жагымдуулугун жогорулатууга көмөк көрсөтөрүн баса белгиледи. Ошондой эле өлкөнүн рейтинги боюнча объективдүү көзөмөл жүргүзүүгө жана агенттик менен натыйжалуу өз ара аракеттенүүнү улантууга үмүтүн билдирди.
Иш сапардын жүрүшүндө Fitch аналитиктери министрликтер менен ведомстволордун өкүлдөрү менен жолугушуп, макроэкономикалык көрсөткүчтөр, санариптик өнүгүү тармагындагы структуралык реформалар, соода-экономикалык байланыштар жана чет элдик инвестицияларды тартуу боюнча кеңири маалымат алышты. Ошондой эле пайдалуу кендерди пайдалануу жана энергетика маселелери Кыргызстандын экономикасынын негизги секторлору катары өзүнчө талкууланды.
Агенттиктин өкүлдөрү эл аралык финансылык институттар менен жолугушууларды өткөрүүнү пландаштырууда, бул өлкөнүн экономикалык абалын ар тараптуу баалоого мүмкүнчүлүк берет.
Маалымдама: 2024-жылдын 10-сентябрында Кыргыз Республикасынын Экономика жана коммерция министрлиги “Fitch” рейтингдик агенттиги менен келишим түзгөн, бул өлкө экономикасынын туруктуулугун эл аралык деңгээлде таануунун маанилүү кадамы болуп калды.
Кыргызстандын суверендүү кредиттик рейтинги боюнча оң баа эл аралык инвесторлордун ишенимин арттырып, өлкөнүн эл аралык финансылык рынокторго жеткиликтүүлүгүн жеңилдетет, карыз алуу чыгымдарын төмөндөтөт жана өлкөнүн экономикасына узак мөөнөттүү капитал тартуу үчүн кошумча мүмкүнчүлүктөрдү түзөт. Ошондой эле бул ишкердик чөйрөнү чыңдоого жана жаңы жумуш орундарын түзүүгө өбөлгө түзөт.
