2025-жылдын 6-февралында борбор калаада "Бир айыл – бир продукт" (ОСОП) улуттук бренддер конкурсу өтүп, мыкты аймактык өндүрүүчүлөр аныкталды. Башкы сыйлыкка Талас облусунан Жанкарачева Батмакан "Ашкабак сорпосу" продукциясы менен ээ болду.   Бул долбоор Кыргыз Республикасынын Экономика жана коммерция министрлиги менен Япониянын Эл аралык кызматташтык агенттиги (JICA) тарабынан 2007-жылдан бери ишке ашырылып келет. Ал айылдык ишкердикти өнүктүрүүгө, жумуш орундарын түзүүгө, жергиликтүү продукциянын сапатын жана атаандаштыкка жөндөмдүүлүгүн жогорулатууга, ошондой эле сатуу базарларын кеңейтүүгө багытталган.   Белгилей кетүүчү жагдай, бүгүнкү күндө ОСОП долбоорунун модели коңшу өлкөлөр – Казакстан жана Тажикстанда да жайылууда.   Быйыл конкурска 50дөн ашуун жаңы продукция сунушталды. Калыстар тобу, анын курамына мамлекеттик органдардын, бизнес-ассоциациялардын жана эл аралык уюмдардын өкүлдөрү кирген, продукциянын сапатын, өзгөчөлүгүн, рыноктук потенциалын жана экспорттук мүмкүнчүлүгүн баалады.   Сыйлык тапшыруу аземинде 21 наам ыйгарылып, ошондой эле 2023–2024-жылдардагы Улуттук бренд продукциясы үчүн атайын сыйлыктар берилди. Жеңүүчүлөр алтын, күмүш жана коло номинациялары боюнча аныкталды, ошондой эле "Эң активдүү аймак" сыйлыгы ыйгарылды.   Конкурс аймактык бизнести өнүктүрүүдө чоң роль ойнойт. Ал жергиликтүү өндүрүүчүлөргө продукциянын сапатын жакшыртууга, брендди чыңдоого, рынокту кеңейтүүгө жана жаңы жумуш орундарын түзүүгө жардам берет. Уюштуруучулардын пикиринде, бул конкурс экономикалык өсүштү камсыздоо жана кыргыз продукциясын жаңы рынокторго илгерилетүү үчүн маанилүү куралга айланып баратат. Жеңүүчүлөр өндүрүштү кеңейтүү мүмкүнчүлүгүнө ээ болушат, ал эми долбоор мындан ары дагы өнүгүп, барган сайын көбүрөөк өндүрүүчүлөрдү камтыйт.   Сыйлыктар тапшырылгандан кийин коноктор катышуучулардын продукцияларын даам татуу жана жаккан товарларды сатып алуу мүмкүнчүлүгүнө ээ болушту.