2024-жылдын 13-14-ноябрында Өзбекстан Республикасынын Ташкент шаарында Борбор Азия өлкөлөрүнүн Соода жол-жоболорун жөнөкөйлөтүү боюнча улуттук комитеттеринин (СЖЖУК) 12-чи региондук жолугушуусу өттү. Иш-чарага мамлекеттик органдардын, аймактагы жеке сектордун жана эл аралык уюмдардын өкүлдөрү катышты. Катышуучулар соода жол-жоболорун жөнөкөйлөтүү боюнча чараларды ишке ашыруудагы жетишкендиктерди, аймактык кызматташтыктын келечегин жана сооданы өнүктүрүү үчүн санариптик чечимдерди киргизүү маселелерин талкуулашты.
Кыргызстандын делегациясы «Кыргыз Республикасында соода жол-жоболорун жөнөкөйлөтүү чараларын ишке ашыруунун прогресси жана келечеги» аттуу презентацияны сунуштады. Презентацияда чек арадагы процесстерди тездетүү жана автоматташтыруу боюнча көрүлүп жаткан чаралар, аймакта тышкы экономикалык ишмердүүлүктү жеңилдетүүгө жана шарттарды жакшыртууга багытталган негизги жетишкендиктер жана пландар чагылдырылган.
Жолугушуунун алкагында катышуучулар «Чукурсай» бажы терминалына тааныштыруу сапарын уюштурушту. Алар терминалдын инфраструктурасы, иштөө процесстери жана соода жол-жоболорун жөнөкөйлөтүүгө жана бажы көзөмөлүнүн натыйжалуулугун жогорулатууга багытталган технологиялар менен таанышышты.
Ошондой эле, аймактык кызматташтыктын төмөнкү багыттары боюнча иш топторунун жыйындары өткөрүлдү:
- Соода жол-жоболорун санариптештирүү жана кагазсыз сооданы өнүктүрүү.
Кыргыз тараптын демилгеси менен бул иш тобу түзүлүп, ал санариптик чечимдерди киргизүү боюнча тажрыйба алмашуу жана чараларды макулдашуу үчүн платформага айланды. - Борбор Азияда транспорт жана транзитти өнүктүрүү концепциясын иштеп чыгуу.
Катышуучулар региондун транспорттук байланыштарын жакшыртуу жана логистикалык инфраструктураны өнүктүрүү жолдорун талкуулашты. - Электрондук фитосанитардык сертификаттарды (еPhyto) киргизүү.
Бул демилге айыл чарба продукциясын сертификаттоо процессин жөнөкөйлөтүүгө жана административдик тоскоолдуктарды азайтууга багытталган. - МДП системасын санариптештирүү (eTIR).
Транзиттик жол-жоболорду автоматташтыруу, чек араларды кесип өтүүнү жөнөкөйлөтүү жана жүктөрдү иштетүү убактысын кыскартуу боюнча чаралар каралды.
Катышуучулар соода жол-жоболорун гармонизациялоо жана санариптик технологияларды интеграциялоо чек ара аралык сооданын натыйжалуулугун жогорулатууда жана аймактагы өлкөлөрдүн эл аралык жеткирүү чынжырларындагы позицияларын бекемдөөдө маанилүү роль ойной тургандыгын баса белгилешти. Кыргыз Республикасы санариптик технологияларды жана бажы процесстерин автоматташтырууну киргизүү боюнча демилгелерди сунуштоо аркылуу соода жол-жоболорун жөнөкөйлөтүү максаттарына берилгендигин ырастоодо.
Иш-чара Германиянын Эл аралык кызматташтык коому (GIZ) тарабынан ишке ашырылган «Борбор Азияда соода жол-жоболорун жөнөкөйлөтүү» долбоорунун колдоосу менен уюштурулду.
Иш-чара Германиянын Эл аралык кызматташтык коому (GIZ) тарабынан ишке ашырылган «Борбор Азияда соода жол-жоболорун жөнөкөйлөтүү» долбоорунун колдоосу менен уюштурулду.
