Бүгүн, 2024-жылдын 3-октябрында, К.И. Скрябин атындагы Кыргыз Улуттук Агрардык университетинде «Кыргыз Республикасындагы стандартизация, метрология жана техникалык жөнгө салуу системасынын калыптанышы жана өнүгүшү» темасында тегерек стол болуп өттү. Бул иш-чара Кара-Кыргыз автономия облусунун түзүлгөндүгүнүн 100 жылдыгына арналып өткөрүлдү.
 
 Жолугушууну профессор Асанбек Ажибеков жана кафедра башчысы Ишенбек Алыкеев  ачышып, стандартизация жана метрологиянын Кыргызстандын экономикасынын туруктуу өнүгүүсү жана дүйнөлүк коомчулукка ийгиликтүү интеграцияланышы үчүн маанилүү экенин белгилешти. Өз сөздөрүндө алар университеттин бул тармактар үчүн жогорку квалификациялуу адистерди даярдоодогу өзгөчө ролун баса көрсөтүштү.
 
 Тегерек столго мамлекеттик мекемелердин өкүлдөрү, анын ичинде Кыргыз Республикасынын Экономика жана коммерция министрлиги, Кыргызстандарт, университеттин мугалимдери жана студенттери катышты. Иш-чаранын программасына системанын калыптаныш этаптарына, анын азыркы абалына жана эл аралык интеграция шарттарында өнүгүү перспективаларына арналган презентациялар жана талкуулар кирди.