2024-жылдын 7-июнунда Экономика жана коммерция министрлигинин чоң залында Кыргызстандын финансы жана экономика кызматкерлеринин күнүнө арналган салтанаттуу чогулуш болуп өттү. 

Министр Данияр Амангелдиев Кыргыз Республикасынын экономика жана коммерция министрлигинин жана жеке өзүнүн атынан кесиптештерин кесиптик майрамы менен чын жүрөктөн куттуктады.

“Урматтуу экономисттер жана финансисттер!

Сиздерди Кыргыз Республикасынын экономисттери жана финансисттеринин кесиптик майрамы менен чын дилимден куттуктайм! Мекен үчүн сиздердин эмгегиңиздер баа жеткис, ар бириңиздердин жасаган ак эмгектериңиздерге, өлкөгө берилип кызмат кылгандарыңызга  жана кесипкөй мамилеңиздерге ыраазычылык билдирем. 

Биз сиздер менен жыл сайын биздин кесиптик майрамыбызды белгилейбиз, ал финансы жана экономика министрликтеринин кызматкерлерин гана эмес, ишканалардын финансы-экономикалык бөлүмдөрүнүн, бухгалтердик жана аудитордук компаниялардын кызматкерлерин, финансылык кызмат көрсөтүү чөйрөсүнүн кызматкерлерин, финансылык аналитиктерди, билим берүү жана илим тармагынын кызматкерлерин да бириктирет.

Бирок белгилей кетсем, бул жыл биз үчүн өзгөчө маанилүү, анткени биз Кара Кыргыз автономиялуу облусунун түзүлгөндүгүнүн 100 жылдыгын белгилеп жатабыз. Бул маанилүү маараке өлкөбүздүн басып өткөн узак жолун эске салат жана өлкөбүздүн калыптануу этаптарында экономисттердин, финансисттердин салымы да бар. 

1980-жылдары өнөр жай секторун интенсивдүү өнүктүрүүнүн аркасында Кыргызстан экономикалык өсүш темпи боюнча өзүнүн тарыхый максимумдарынын бирине жеткен. 2000-жылдары, көз карандысыздыкка ээ болгондон кийин, өлкө экономикасын турукташтырууга жетишти жана чакан жана орто бизнести өнүктүрүүдө олуттуу ийгиликтерге жетишти.

Акыркы жылдары биз финансылык-экономикалык сектордогу реформалар көмөктөшүп жаткан экономикалык өсүштүн жаңы багытын байкадык. Сиздердин аракетиңиз жана стратегиялык көз карашыңыз менен биздин экономика алдыга карай ишенимдүү кадам шилтейт. Акыркы жылдары Кыргызстандын ИДПсы туруктуу өсүүдө жана бул өсүш  сиздердин финансы-экономикалык системанын өнүгүшүнө кошкон салымыңыздын  натыйжасы.   Бардыгыңыздарга белгилүү болгондой, өткөн жылы өлкөнүн ИДПсынын номиналдык көлөмү 1 228,9 млрд.сомду түзгөн. Бул дүйнөлүк экономикалык туруксуздуктун шартында олуттуу жетишкендик болуп саналат.

Өлкөнүн чет элдик инвестициялар үчүн түзүлгөн жагымдуулугу башка өлкөлөр менен сооданын көлөмүнүн олуттуу өсүшүнө өбөлгө түздү, бул жалпы экономикага оң таасирин тийгизди жана жаңы жумуш орундарын түзүүгө жана ар кандай тармактарды өнүктүрүүгө өбөлгө түздү. Бул бизнес үчүн жаңы горизонтторду ачат жана андан ары   өнүгүүгө гүлдөп-өнүгүүгө   жагымдуу шарттарды түзөт.

Бул жетишкендиктердин бардыгы сиздер менен болгон ынтымактуу ишибиздин аркасында  ишке ашууда. Ынтымактуу иш, бирдиктүү жамааттык дух жана жалпы максаттарга умтулуу республикабыздын эл аралык аренадагы экономикалык позициясын бекемдөөгө жана ар бир жарандын бакубаттуулугун жогорулатууга өбөлгө түзөт.

Сөзүмдүн аягында ар бириңиздерге бекем ден соолук, жаңы кесиптик ийгиликтерди жана карьералык өсүштү каалап кетем. Ар бириңиздер жасаган ишиңиздерден урмат-сый көрүп, ар бир кылган эмгегиңиздер сыймык алып келсин. Майрамыңыздар менен!”- 

министр Д. Амангелдиев белгиледи.

Андан соң сыйлык тапшыруу аземи болду.